Áhrif á ársreikning Þróttar
Ég skilaði nýverið inn BSc ritgerðinni minni sem ber heitið Eignfærsla leikmannasamninga í ársreikningum íslenskra knattspyrnuliða. Viðfangsefni ritgerðarinnar er undanþága sem KSÍ fær frá reikningsskilareglum UEFA varðandi eignfærslu leikmannasamninga í ársreikningum. Á grundvelli undanþágunnar er svokallað stuðlakerfi notað sem leið til þess að verðmeta leikmenn í ársreikningum íslenskra knattspyrnuliða. Í ritgerðinni var leitast við að svara þremur rannsóknarspurningum:
- Hvaða áhrif hefur stuðlakerfið á ársreikninga íslenskra knattspyrnufélaga?
- Er stuðlakerfið í samræmi við lög og reglur?
- Er stuðlakerfið nauðsynlegt fyrir íslensk knattspyrnufélög?
Í stuttu máli þá hefur stuðlakerfið víðtæk áhrif á ársreikningana, en þó er fjárhæðirnar sjálfar óverulegar. Einnig var það niðurstaða mín að stuðlakerfið væri ekki í samræmi við ársreikningalögin né alþjóðlega reikningsskilastaðla. Loks tel ég að stuðlakerfið sé ekki nauðsynlegt fyrir íslensk knattspyrnufélög og að KSÍ þurfi að hætta með undanþáguna og aðlaga sig að reikningsskilareglum UEFA.
Næstu daga mun ég birta búta úr ritgerðinni.
Áhrif á ársreikning Knattspyrnufélagsins Þróttur árið 2024
Í ársreikningi Þróttar R. fyrir árið 2024 voru leikmannasamningar eignfærðir á 7.481.333 krónur. Af þeim voru 5.100.000 krónur leikmannasamningar sem voru eignfærðir samkvæmt stuðlakerfinu. Með öðrum orðum þá voru 68,2% af leikmannasamningum eignfærðir samkvæmt stuðlakerfinu í ársreikningi Þróttar. Hlutfall leikmannasamninga af heildareignum Þróttar er núna 15,0% en ef eignfærsla leikmannasamninga hefði verið færð samkvæmt reikningsskilareglum UEFA þá væri hlutfall leikmannasamninga af heildareignum 5,2% (Knattspyrnufélagið Þróttur, 2024).
Með því að nota reikningsskilareglur UEFA þá myndu afskriftir í rekstrarreikningnum hækka um 67.677 krónur og þar af leiðandi myndi afkoman fara úr því að vera 8.822.632 krónur niður í 8.754.955 krónur. Þessi lækkun á afkomunni nemur 0,77%.
Eignirnar myndu lækka um 5.167.677 krónur og fara úr 49.959.341 krónu niður í 44.791.664 krónur. Þessi lækkun á eignum nemur 10,3%.
Eigið fé myndi lækka um 5.267.777 krónur í heildina. Lækkunin skiptist annars vegar í lækkun upp á 1.000.000 krónur á endurmatsreikningi leikmanna, sem myndi þurrkast út algjörlega. Hins vegar myndi óráðstafað eigið fé lækka um 4.267.677 krónur sem skiptist í 4.200.000 krónu eignfærslu leikmanna fyrir árið 2023 og afskrift fyrir árið 2024. Heilt yfir þá færi eigið fé úr því að vera 35.964.929 krónur niður í 30.697.252 krónur. Þessi lækkun eigin fjár nemur 14,6%. Eigið fé og skuldir færu þá úr því að vera 50.059.341 króna niður í 44.791.664 krónur en sú lækkun nemur 10,5%.
Breytingin á handbæru fé í sjóðstreyminu væri sú sama, en þó myndu hreyfingar eiga sér stað í sjóðstreyminu. Það er vegna þess að afkoman lækkar um 67.677 krónur en afskriftirnar hækka á sama tíma um 67.677 krónur og því væri hreint veltufé frá rekstri ennþá það sama. Aðrir liðir í sjóðstreyminu breytast ekki.
