Víkingur R. eyddi 47 milljónum króna í leikmannakaup árið 2025
Í ársreikningi Víkings R. fyrir árið 2025 má sjá að tekjur af leikmannasölu voru 168 milljónir, laun og launatengd gjöld voru 379 milljónir, tap var af starfseminni upp á tæplega 100 milljónir króna, fasteign var keypt fyrir 50 milljónir, 47 milljónir fóru í leikmannakaup og skuldir lækkuðu.
Greinin var einnig birt á fotbolti.net
Rekstrartekjur
Á síðasta ári voru rekstrartekjur Víkings R. 622 milljónir króna sem er rúmlega helmingi minni rekstrartekjur en árið áður, en þó af góðum ástæðum. Árið 2024 fékk Víkingur vitaskuld gífurlega mikla peninga vegna góðs árangurs í Sambandsdeildinni og því var vitað að tekjurnar myndu lækka. Ef við tökum því árið 2024 út fyrir sviga þá má sjá að 2025 tölurnar hækka um 17,3% frá því sem var árið 2023. Stærsti hluti tekna Víkings árið 2025 er flokkaður undir öðrum rekstrartekjum, tæplega helmingur tekna ársins, en þar á eftir kom ríflega fjórðungur tekna vegna sölu leikmanna.
Tekjur af leikmannasölu
Víkingur hefur aldrei fengið eins miklar tekjur fyrir leikmannasölur og þeir gerðu árið 2025. Í heildina fengu þeir tæplega 168 milljónir eftir að hafa einungis selt leikmenn fyrir 5 milljónir króna árið áður. Á síðasta ári seldi félagið meðal annars Gísla Gottskálk Þórðarson til Lech Poznan, Danijel Dejan Djuric til NK Istra og Ara Sigurpálsson til Elfsborg.
Aðrar rekstrartekjur
Aðrar rekstrartekjur Víkings voru 298,8 milljónir króna á síðasta ári. Bróðurpartur þeirrar fjárhæðar kom frá UEFA. Vegna þátttöku í Evrópukeppni fékk Víkingur 230,8 milljónir króna og einnig fékk Víkingur 30,7 milljónir króna samstöðugreiðslur.
Rekstrargjöld
Rekstrargjöld Víkings R. voru 723,1 milljónir króna árið 2025. Í samanburði við árið 2024 þá lækkuðu rekstrargjöldin um 17,9%, töluvert lægri lækkun en var á rekstrartekjunum sem rúmlega helminguðust á milli ára. Stærsti útgjaldaliður Víkings árið 2025 voru laun og launatengd gjöld sem námu 60,9% af rekstrargjöldum Víkings. Þar á eftir fór rúmlega 45,4% af rekstrargjöldunum í annan rekstrarkostnað.
Afskriftir Víkings hækkuðu nokkuð hressilega á milli ára. Árið 2024 námu þær 4 milljónum króna en voru 22 milljónir króna árið 2025. Í skýringum ársreikningsins má sjá að afskriftirnar eru langmestu leyti vegna leikmanna. Þetta má því líklega rekja að miklu leyti til Gylfa Þórs Sigurðssonar sem var keyptur dýrum dómi og skrifaði undir tveggja ára samning. Rúmlega helmingur kaupverðsins ætti því að hafa verið afskrifað árið 2025. Þar að auki keypti Víkingur einnig Atla Þór Jónsson fyrir háa fjárhæð sem hefur eflaust talið mikið í afskriftum Víkings árið 2025.
Launagreiðslur
Í skýringum ársreiknings Víkings eru launagreiðslur sundurliðaðar. Árið 2025 námu heildarlaunagreiðslur samtals 379,3 milljónir króna. Stærsti hluti þess, tæplega tveir þriðjungar, fóru í verktakagreiðslur sem voru 247,8 milljónir króna.
Launahlutfallið hjá Víkingi er nokkuð áhugavert. Á tímabilinu 2021-2023 var launahlutfallið að meðaltali 44,1% en það lækkaði hressilega árið 2024 þegar launahlutfallið var 33%. Hins vegar skaust launahlutfallið upp árið 2025 upp í 60,9%. Hér gæti vel verið að leikmenn hafi fengið einhverjar bónusgreiðslur tengt árangrinum í Sambandsdeildinni í byrjun árs 2025. Það er sennilega líklegasta skýringin á þessari hækkun á launahlutfallinu.
Annar rekstrarkostnaður
Annar rekstrarkostnaður var næststærsti útgjaldaliður Víkings árið 2025. Í skýringum ársreikningsins má finna sundurliðun á honum þar sem ýmis kostnaður kemur fram. Það áhugaverðasta er sennilega þær 17 milljónir sem Víkingur eyddi í vallarleiga fyrir Sambandsdeildina. Víkingur tók Bolt Arena í Helsinki á leigu fyrir viðureign þeirra gegn Panathinaikos í febrúar 2025. Árið áður hafði félagið tekið Kópavogsvöll á leigu fyrir heimaleiki sína í deildarkeppni Sambandsdeildarinnar, það kostaði 12,7 milljónir króna.
Afkoma
Knattspyrnudeild Víkings var rekin með tapi 100 milljón króna tapi árið 2025. Þetta er raunar nokkuð kunnuglegt stef frá því sem sást hjá Breiðabliki í ársreikningi þeirra árið 2024. Breiðablik tók þátt í Sambandsdeildinni tímabilið 2023/24. Ársreikningurinn fyrir árið 2023 sýndi myljandi hagnað en í 2024 ársreikningnum mátti sjá tap upp á tæplega 104 milljónir króna. Það sama virðist hafa gerst hjá Víkingi. Þeir tóku þátt í Sambandsdeildinni tímabilið 24/25. Ársreikningurinn fyrir árið 2024 sýndi myljandi hagnað en í 2025 ársreikningnum má sjá tap upp á tæplega 100 milljónir króna.
Ef við horfum á rekstrarafkomu Víkings síðustu fimm árin og tökum leikmannasölur út fyrir sviga þá er uppsafnað hagnaður 380 milljónir króna. En þegar leikmannasölur og fjármagnsliðir eru teknir með í jöfnuna, þá er uppsafnaður hagnaður 724 milljónir króna.
Eignir
Eignir Víkings námu 427 milljónum króna í árslok 2025. Stærsti hluti eigna Víkings eru í formi verðbréfaeignar, eða tæplega 42,0%. Víkingur keypti upprunalega verðbréf árið 2024 en hafa, að því virðist, selt tæplega helming af því núna á síðasta ári. Viðskipta- og aðrar skammtímakröfur voru næststærsta eignin en þær námu 95,6 milljónum króna í árslok 2025. Rekstrarfjármunir eru þriðja stærsta eignin, en sú eign fimmfaldaðist á milli ára. Í skýringum ársreikningsins má sjá að Víkingur hefur keypt fasteign fyrir 50 milljónir króna á árinu.
Handbært fé
Handbært fé Víkings stóð í 44,4 milljónum króna í árslok 2025 og hækkaði um ríflega 25 milljónir króna á milli ára. Ef sjóðstreymið árið 2024 og 2025 er borið saman má sjá miklar sveiflur. Árið 2024 nam veltufé frá rekstri 407,5 milljónum króna, en ári seinna er það búið að sveiflast um ríflega 600 milljónir króna og nam veltufé til rekstrar 206 milljónum króna árið 2025.
Þá var handbært fé frá rekstri 339,7 milljónir króna árið 2024 en sveiflast um tæplega 522 milljónir króna á milli ára þar sem handbært fé til rekstrar nam 183,6 milljónum króna.
Loks má sjá töluverðan mun á fjárfestingarhreyfingar. Árið 2024 voru fjárfestingarhreyfingar Víkings neikvæðar um ríflega 342 milljónir króna vegna kaupa á verðbréfum og leikmönnum. Ári síðar má sjá að fjárfestingarhreyfingar Víkings eru jákvæðar um tæplega 208 milljónir króna vegna sölu á leikmönnum og verðbréfum. Í heildina hækkaði því handbært fé Víkings um 25 milljónir króna.
Veltufjárhlutfall
Sökum góðrar skuldastöðu Víkings er veltufjárhlutfallið þeirra gífurlega hátt. Í árslok 2025 var það 965,7% og hækkaði um 157,6 prósentustig á milli ára. Heilt yfir hefur það verið 565,1% að meðaltali síðustu fimm árin.
Skuldir
Skuldir Víkings stóðu í 33,4 milljónum króna í árslok 2025 og lækkuðu um tæplega 28,5 milljónir króna á milli ára. Skuldir Víkings eru að mestu viðskipta- og aðrar skammtímaskuldir sem námu 31,6 milljónum króna í árslok 2025.
Skuldahlutfall
Skuldahlutfall Víkings er verulega gott en það var 7,8% í árslok 2025 og lækkaði um 3,8 prósentustig á milli ára. Yfir síðustu fimm árin hefur það að meðaltali verið 19,1%
Eigið fé
Eigið fé Víkings lækkaði á milli ára vegna tapreksturs og stóð í 393,7 milljónum króna í árslok 2025. Eigið fé Víkings skaust upp í 488 milljónir króna árið 2024 vegna sterkrar afkomu það árið.
